ஆயத்தமாயிருங்கள் (“தயாராக இருங்கள்”)

ஆயத்தமாயிருங்கள் (“தயாராக இருங்கள்”) வேத பகுதி: மத்தேயு 24:36-44

 

1907 ஆம் ஆண்டில், பேடன் பவல் என்ற ஆங்கிலேய சிப்பாய்  “தயாராக இருங்கள்” என்னும் சாரணர் குறிக்கோளை உருவாக்கினார்.  திறமையான குடிமக்களாகவும் வலுவான தலைவர்களாகவும் மாறுவதற்கும், மற்றவர்களுக்கு மகிழ்ச்சியைக் கொண்டுவருவதற்கும் சாரணர்கள் தங்களை தயார்படுத்திக் கொள்ள வேண்டும் என்பதே அவரது யோசனையாக இருந்தது.  ஒவ்வொரு சாரணரும் மனதிலும் உடலிலும் தயாராக இருக்க வேண்டும் என்றும், தனக்குக் காத்திருக்கும் சவால்களை வலுவான இதயத்துடன் எதிர்கொள்ளவேண்டும் என்றும் அவர் விரும்பினார்.  2025 செப்டம்பரில், எங்கள் முதல் பேத்தியின் “ Eagle Court of Honour ”என்ற விழாவில் நேரில் கலந்து கொள்ள கடவுள் எங்களுக்கு உதவினார். 

'தயாராக இருங்கள்' என்ற சாரணர் குறிக்கோள் எனக்கு சவால் விடுத்தது,  ஏனெனில் இது ஒரு விசுவாசியின் வாழ்க்கையை அழகாக சித்தரிக்கிறது.  'தயாராக இருங்கள்' என்னும் வார்த்தைகள் சவால்கள், சேவை மற்றும் பொறுப்புக்கு தயாராக இருக்க வேண்டும் என்பதை நமக்கு நினைவூட்டுகிறது.  அவசர நிலைகளுக்கு மட்டுமல்ல, அன்றாட விசுவாசத்திற்கும் ஆன்மீக ரீதியாக தயாராக இருக்க வேண்டும் என்ற யோசனையை இயேசு தம்மைப்பின்பற்றுபவர்களை அழைக்கும்போது பயன்படுத்துகிறார்.  கிறிஸ்துவுக்கு ஆயத்தமாக இருப்பது இதயத்தில் தொடங்குகிறது. ஜெபம், கடவுளின் வார்த்தையை வாசிப்பது மற்றும் அதை தியானிப்பதன் மூலமும், கடினமான சூழ்நிலையில் இருக்கும்போது கூட வார்த்தைக்குக் கீழ்ப்படிதலைத் தேர்ந்தெடுப்பதன் மூலமும் மட்டுமே நம் இதயங்களை தயார் செய்ய முடியும்.  ஒரு கிறிஸ்தவன் கடவுளுடன் உள்ள அன்றாட ஒழுக்கத்தின் மூலம் வளருகிறான்.  

தயாராவது என்பது மற்றவர்களுக்கு சேவை செய்யத் தயாராக இருப்பதையும் குறிக்கிறது.  இயேசு சேவை செய்யும் வாழ்க்கையை வாழ்ந்தார்.  எப்போதும் தேவைப்படுபவர்களிடம்  தன் கவனத்தை செலுத்தினார்.  ஒரு ஆயத்தமான கிறிஸ்தவர் கண்களைத் திறந்து, கைகளைத் தயாராக வைத்து, மனஉருக்கத்துடன் செயல்பட ஒரு இதயத்தைத் தயார்படுத்துகிறார்.  இறுதியாக, தயாராக இருப்பது என்பது ஒரு நித்திய கண்ணோட்டத்துடன் வாழ்வதைக் குறிக்கிறது.

கிறிஸ்து எப்போது திரும்பி வருவார் என்று நமக்குத் தெரியாது, ஆனால், நாம் எப்படி வாழும்படி அழைக்கிறார் என்பது நமக்குத் தெரியும்.  உண்மையுடனும், அன்புடனும், கீழ்ப்படிதலுடனும். விசுவாசிகளாக, நாம் இந்த வாழ்க்கையின் சவால்களை எதிர்கொள்ள தயாராக இருப்பது மட்டுமல்லாமல், கிறிஸ்துவை ஆன்மீக தயவுடன் ஏற்றுக்கொள்ளவும் தயாராக இருக்க வேண்டும்.  பசியுள்ளவர்களுக்கு உணவளிக்கவும், தாகமுள்ளவர்களுக்கு தாகத்தை தீர்க்கவும், நிர்வாணமாக இருப்பவர்களுக்கு ஆடை அணியவும் வேதம் சொல்கிறது.  மேலும், நோய்வாய்ப்பட்டவர்களையும் சிறையில் உள்ளவர்களையும் சந்திக்கவேண்டும். ஏனென்றால், மிகச்சிறியவர்களுக்கு நாம் எதைச் செய்தாலும், அதை ஆண்டவருக்கே செய்கிறோம் என்று வேதம் கூறுகிறது.

என் நண்பரே, இந்த புத்தாண்டில், ஆன்மீக ஒழுக்கத்தை உணர்வுபூர்வமாக வளர்த்துக்கொள்வோம். அதற்கு தியாகம் தேவை.  கிறிஸ்துவுக்காக வாழ்வது என்பது கடவுளின் வார்த்தை நம் இதயங்களை சீர்படுத்த வேண்டும், ஜெபம் நம் மனசாட்சியை புதிப்பிக்க வேண்டும், நமது சித்தம் கடவுளிடம் ஒப்படைக்கப்பட வேண்டும்.

 

ஜெபம்:  கர்த்தராகிய இயேசுவே, உமது சித்தத்தைச் செய்யவும், உமது வார்த்தையில் வேரூன்றி நிற்கவும், மற்றவர்களின் தேவைகளுக்குக் கவனம் செலுத்தவும், ஒவ்வொரு கணமும் உண்மையுள்ள ஒரு வாழ்க்கையை வாழவும் எனக்கு உதவுங்கள்.  தயாராக இருக்க கற்றுக்கொடுங்கள், பயத்தினால் அல்ல, ஆனால் நம்பிக்கையுடனும் கீழ்ப்படிதலுடனும் செய்ய உதவுங்கள். ஆமென்!!!

---